آذربايجانين با تي بولگه لرينده فولکلور پوتانسيل‌لري
و اونون تدقيق و نشرينده پروبلئم‌لر
دوکتور توحيد ملک زاده ديلمقاني
آذربايجان اراضي سيني تشكيل ائدن منطقه‌لر ان قديمزامانلاردان بو گونه قدر توركلرين يوردو اولموشدور . اسكي آذربايجان خالقلاريندان آس ، آراتتا ، ماننا ، اورارتو ،كيمئر و سايير پورتو - توركلر ياشاديقلاري آذربايجان اراضيسينده توپونيم و ائتنونيم واسطيه‌سيله ايزلريني بوراخميشلار . يالنيز بو اؤز‌ل آدلار دئييل ، اسكي توركخالقالارين ايزلريني ، اسكي توركلرين اينانج طرزي (توتئميزم و شامانيزم ) يا دا اسكي حيات طرزي موتيولريني شيفاهي ادبيات‌دا دا گؤرمك مومكوندور . ايسلاميت ده ن سونرا اوغوز وسونرالارقيپچاق توركلرين اذبايجانا قالاباليق گليشلري خالقيميزين اسكي توركلردن ميراث قالميش معنوي حياتي داها دا زنگين‌لشدي . بئله ليكله آذربايجان تورپاقلاريندا ساكين اولان تورك كؤچري خالقلاري قديم آذربايجان دا ياشايان توركلرله قاووشوب يئني آذربايجان توركو و ميلّي ادبيات ، موسيقي و فولكلوروموزوتشكيل ائتديلر .
1- آذربايجانين غرب منطقه‌لرينده فولكلور پوتانسيئل‌لري :

آذربايجان دا ياشايان توركلر دئديگيميز كيمي پروتو توركلره قاريشميش اوغوز وقيپچاق توركلري ايديلر . افشارلار ، باياتلار ، بئگديلي لر، قاراپاپاقلار ،آق‌قويونلو و قارا قويونلولار تورك دؤولتلرينين قورولماسيندا چوخ تاثيرلي و اؤنملي روللاري اولموشدور. حتا چوخو ميثال اولاراق افشارلار كيمي دؤولت قوروجولاردان اولموشلار . بعضي لري ايسه باياندير و چپني‌لركيمي آذربايجان و آنادولونون اورتاق حاكميت آلتيندا ياشامالاريني باشارميشلار .بيز بو مقاله‌ده يالنيز آذربايجانين جنوبوندا و اونون غرب بؤلگه لرينده تاريخ بويو ياشايان اوغوز توركلري بويلاريندان دانيشيب ، بو طايفالارين موعاصير آذربايجان فولكلوروندا نه قدر مهم روللاري اولدوقلاريندان دانيشاجاغيق .آذربايجان غرب بؤلگه‌لري ايران ايچينده غربي آذربايجان ايالتي اولاراق تانينير . مركزي ايسه تورك يوردو اولان افشارلارين ياشاديغي مركز، »اورميه« شهري دير .بو بؤلگه‌نين ان شيمالي منطقه‌سي اسكي تاريخيميزده ايروان و ناخجيوان شهرلري ايله بيرليكده چوخور سد منطقه سيني تشكيل ائدرديلر . »ماكو« شهري بايات توركلري‌نين مركزي دير. بو شهر شيرين لهجه ايله دانيشان ماكولولار زنگين فولكلورا ماليك دير لر . ماكو شهرينين ايكي يوزمين نفرليك نفوسونون چوخو باياتلارا منسوب دور .ماكو شهرينه باغلي شهرين جنوب منطقه‌لريني تشكيل ائدن بؤلگه‌ده بو گونه قدر قديم آذربايجان حروفي ليك مفكوره‌سيني ساخلايان قارا قويونلو توركلري ياشايير .آذربايجان شيفاهي ادبياتينا خصوصيله عاشيق صنعتي نين ساخلانيب انكيشافيندا قارا قويونلو توركلرينين چوخ اؤنملي روللاري اولموشدور . اونلار هئترودوكس ايسلاما اينانير واهل حق دن ديرلر . خالقي‌ميز اونلارا علي آللاهي يا گوران دئييرلر . بو منطقه‌ده ياشان خالقيميز آراسيندا قديم آذربايجانين صوفي - تكّه عاشيق گله‌نكلري دوام ائتمكده دير. شيمال دان جنوبا گليركن ايكينجي شهر تاريخ بوْيو شؤهرتي اولان »خوْي« شهري دير . خوي‌دا ، موختليف تورك بويلاريندان علاوه آذربايجان دا آدلاري آز گؤرونن ييوا (ايوا ) توركلري ياشاماقداديرلار . ائو اوغلو توپونيمي بونا شاهيد دير. اونلاردا زنگين فولكوراماليك خالقلاريميزدان ديرلار .»سالماس« شهري شيمال دان جنوبا گليركن اوچونجو شهردير .سالماسين شيمال - غربين ده ياشايان كوره سونلي ( گيره سونلي ) توركلري دَگرلي فولكورا صاحيب اينسانلارديرلار .باشقا يئرده تايلاري آز گؤرونن بو خالق » چپني « ائلينه منصوب و شافعي اينانج لي توركلردن ديرلر. سالماس ، خوي واورميه ده نفوسلاري تخيمناً 150 ـ مين نفر اولار . اونلارين دانيشيق شيوه سي آذربايجان و آنادولو توركلرينين كؤرپوسو ساييلير .سالماس دا ياشايان بير آيري تورك طايفاسي دا »لك‌لر« دير. شاه عابباس زامانين‌دا سالماسا كؤچدورولن بو طايفا ،سالماسين دوققوز پارا كندينده ياشايير و فولكلورباخيميندان دگرلي قايناق ساييلير . لك لرين چوخ آز قيسميده آذربايجانين باشقا شهرلرينده ياشايير .
غربي آذربايجان ايالتي‌نين مركزي »اورميه« شهرينه گليركن قوجامان افشار ائليني گؤروروك . منطقه‌ني قوروماق اوچون شاه عابباس زامانين‌دا بورايا كؤچدورولن افشارلار درين و زنگين فولكلور و تايي آز گؤرونن عاشيق صنعتينه ماليك اولان خالقيميزدان‌ديرلار . يوزلرعاشيقيميز تاريخ بوْيو بؤلگه‌ده عاشيق صنعتيني قوْرويوب اينكيشافيندا ايشتيراك ائتميشلر .تبريز - قاراداغ عاشيق صنعتين‌دن فرقلي اولاراق ، اورميه عاشيق صنعتي يالنيز اورتا آسيادا گؤرونن ، تك سازلا ايفااولونور . بورادا بالاباندان خبر يوخ . افشارلار هم شهرده هم ده كندلرده ياشاماقداديرلار . اورميه و سالماس و سايين قالادا نفوسلاري دؤرد يوزمين نفر اوْلار .
اورميه شهري نين جنوبوندا مؤحتشم »قاراپاپاق« يوردو ،»سولدوز« شهري هرتورلوتضييق لره قارشي توركلوگون ائله جه ده آتا - باباميزدان ميراث قالان فولكلوروموزو قوْرويوب ساخلاماقداديرلار . 1800ـ جو ايللرده قاجار ـ روس ساواشلاري سيراسيندا آرازين شيماليندان جنوبا كؤچن بوخالقيميزين بير قيسمي هله ده اينديكي گورجستانا باغلي بورچالي دا ، بير قيسمي دا توركيه‌ده قارص دا ياشاماقداديلار و سولدوز ، سالماس و اورميه ده نفوسلاري تخميناً 150ـ مين نفردير.
2- ايران دا فولكلور توپلاماق و تدفيق مركز‌لري :‌
بيلينديگي كيمي ممالك محروسه ايران 1925 ـ جي ايلدن بري آذربايجان توركلري حاكميتين دن چيخميش و چوخ ميلت لي شكلي‌ندن تك ميلت لي ( فارس - آريا ) مملكته چئوريلدي . بو دؤنوشون سببلري و گئدن آشامالاري آچيقلاماغينا بو يازي دا يئر يوخ آمما بو دؤنوشون فارس اولمايان خالقلاري خصوصيله آذربايجان توركلرينه جيدي ضربه ووردوغونو قئيد ائتمكده فايدا وار .پهلوي شاهليق باشلايينجا مملكتين بوتون ايمكانلاري فارس كولتورونه وئريلدي و آذربايجان مدنيتي دوُردورولدو .آذربايجان جمهوريتينده مدنيتيميز اينكيشاف ائتديگي زامان ،ايراندا شاهين باسقي و تضييقي ايله آذربايجان مدنيتي گئري گتمه‌گه محكوم اولدو . شاه زاماني خالقيميز يالنيز بويوك شهرلرده ا فولكلورلا هوبي اولاراق ماراقلانابيليردي . آذربايجانين باشقا شهرلري فولكلوروموزونتوپلانماسيندا چوخ بؤيوك رول اويناميشلار . تاسف لر اولسونكي او زامانلار راديولار فولكلورون نشرينده كيتاب يايماغا گئچه بيلمه ميشلر . آذربايجان توركجه سينده كيتاب و مقاله اولاراق يالنيز دوكتور مجتهدي ، دوكتور جاويدين و دوكتورفرزانه‌نين كيتابلاريني گؤره بيليريك . فارسجا اولاراق دا بهرنگي و تهران راديو‌سوندا چاليشان انجوي شيرازي نين كيتابلاريني گؤرمك مومكوندور . قالان ايسه كور اوغلو ،اصلي كرم و بو كيمي خالق ناغيللا ريميزين عاشيقلار ديليندن آلينما هيئچ رئداكته اولمايان شكيل ده باسيلميش كيتابلاريدي .
1979 ايسلام اينقيلابيندان سونرا توركجه و آذربايجان مدنيتينه اويقولانما ياساق قالديريلسا دا يئنه اسكي دؤولت پوليتيكاسي كيمي دؤولتين كولتور پروگراملارينا آذربايجان ديل ،ادبيات و فولكلورو نا هئچ يئر وئريلمه‌دي .موعاصير ايران دا فولكلور توپلاما و تدقيقي اوچون هئچ بير ايداره و يا انستيتو يوخدور . . آذربايجان فولكلورو ساحه سينده ده بو گونه قدر جدي بير ايش گؤرولمه ميشدير .
3- آذربايجان دا فولكلورون بو گون‌كو وضعيتي:
90 ـ جي ايللردن اعتباراً آذربايجان تاريخينده يئني صحيفه‌لر آچيلدي . او گونلردن بري اونيورسيته طلبه لري باشدااولماقلا ضيالي‌لاريميز و مدنيتيميزين قايغي‌كش اينسانلاريبو ايش ده چوخ موفقيت‌لره نائيل اولدولار . شوعورلوخالقيميز تاريخيميز ، فولكلوروموز و خولاصه مدنيتميزين هر قولوندا نه قدر جيدي باشاريلار الده ائتسه‌لرده علمي مئتودلار و تئكنيك مسئله لرله تانيش اولان اينسانيميز وتدقيقيميز چوخ آزدير . ايران اونيورسيته‌لاريندا آذربايجانليطلبه‌لر اوچون آچيلان آذربايجان توركجه‌سي ، درسي كيفايتقدريله پروبلئميميزي حل ائده بيلمه‌دي .سوْن زامانلار اورميه و تبريز اونيورسيته‌لاريندا رسما ًآذربايجان توركجه‌سي كورسوسو آچيلاماسي ياخين گله‌جكده علمي كادرويا صاحيب اولماميز دئمكدير . بو ايسه بلكه‌آذربايجان مدنيتي تدقيقينده اولان علمي پروبلئم لريميزي چؤزه بيلسين .
4- سالماس منطقه‌سينده توپلاديغميز فولكلورا گؤره :‌
سالماس منطقه سيندن توپلاديغيميز آلتي كاسئت ، خالق ناغيللاريميز ، باياتيلار ، سايا شعرلريني ائحتيوا ائتمكده دير . بو ناغيللارين باشيندا ناغيلي سؤيله‌ين ايلك باشدا اؤز آدي ، فاميلي ، آتا آدي ، نئچه ياشدا اولدوغو وكيمدن ناغيلي اؤيرنديگيني دئديكدن سونرا ناغيليني دئمه‌گه باشلايير . ناغيللارين هر زامانكي ايلك جومله‌سي ، »بيرگون واريدي بير گون يوخ ايدي . آللاه دان ( يا خودتانري‌دان ) غير از هئچ كيم يوخ ايدي« ، كيمي جومله‌لرله باشلايير . ييغديغيميز بعضي ناغيللارين آدلاري بئله دير : ياخشي‌ليق ائيله آت دريايا باليق دا بيلمه‌سه خاليق بيلر ، عزرائيلين ناغيلي ، ايكي قارداش، قبريستانليق ، بير سؤز دئيبلر ايكي يوخ ،گئچي نين ناغيلي ، شاه اسماعيل ناغيلي ، شاه عابباس ناغيلي ، زومروت قوشو ، فاطما خانيم ،اوره‌ك ياراسي وساييره.

5- سالماس دا فولكلور توپلامادا قارشيلاشديغيميز بعضيپروبلئم لر :
بيز اساس اولاراق فولكلور توپلاماني آذربايجانين غرب ويلايتلريندن ساييلان سالماس شهرينده باشلاديق. آلتي كاسئته ييغديغيميز ناغيللار توپلوسو سالماس شيوه‌سيله آذربايجان ناغيللاري ، باياتيلاري و خالق ماهني لاريني ائحتيوا ائدير . بو كاسئتلر يالنيز آذربايجان فولكلورو اوچون مهم دئييل . آذربايجان توركجه‌سينده سالماس آغيزينين تدقيقي اوچون ده چوخ فايدالي اولاجاق . بوگون بوكاسئتلرين سالماس آغيزيني تدقيق اوچون توركيه‌ده عالي مكتب‌لر و دوچئنتليك تئزي اولماسينا پلانلار وار .
اساس اعتباريله سالماس دا فولكلور توپلامادا بيز ايكي مهم پروبلئم له قارشي قارشي‌يا گلديك :
1- فولكلور سؤيله ين اينسانلا تانيش اولماماق
2- كاسئت و ميكروفون‌دان مئيدانا گلن پروبلئم لر
سوسيال وضعيت باخيميندان موسلمان اؤلكه‌لر عموميتله باغلي اؤلكه‌لردير . آذربايجان كندلري ده بو وضعيت‌دن مستثني دئييلديرلر . كيشي ، قادين موناسيبتلري نورمال بيرسوييه‌يه چاتماميش . سوسيال علملرينده تدقيق اوچون مئيدان اولماديغينا گؤره خالقيميز بو كيمي آراشديرمالارا عادت ائتمه‌ميشديلر . بيزيم فولكلوروموزون اصيل قايناقلاري قادينلار اولدوغوندان يوخاريدا كي مسئله ني گؤزه آلاراق ياشلي قادينلارين ياخين قوْهوملارينا موراجيعت ائده‌رك اونلاردان يارديم ايسته‌ديك .هئچ بير بيگانه اولمايان يئرده بو كاسئتلر يازيلدي ، عائله محيطينده قديم ائشيتديگيميز ننه‌لريميزين ناغيللاري كيمي ، بيزجه بوشيوه‌ فولكلور توپلامادا داها ساغلام بير شيوه دير .فولكلور توپلامادا باشقا بير پروبلئم ايسه كاسئت وميكروفون اولان يئرلردير. بئلنچي محيط‌لرده كيشي ياخود قادين اؤزونو تضييق آلتيندا حيس ائده‌رك ، ايراندا »عيبارتي « سؤزويله مشهور اولان اصطلاح دا دانيشيق طرزينه گئچير .ايجازه وئرين» عيبارتي « سؤزونو آچيقلاييم . بو ايصطيلاح پيسيكولوژيك تضييق آلتيندا خالقيميزين آذربايجان توركجه‌سيني فارس ديلي و گرامئري چرچيوه سينده ايفاده ائتمك دئمك دير . بو طرز دانيشيق دا عموماً آذربايجان توركجه‌سي گرامئري پوزولور و مكتب‌لرده تحصيل آلينميش فارسجا گرامئر و تركيب لري يئرينه اوْتورور . بوگون بودانيشيق طرزينه آذربايجانين تامام راديو – تلويزيونوندا راست گلمك مومكوندور . ضيالي لاريميز رسمي يئرلرده گؤرونن بو طرز دانيشيغا هَجو اولاراق فاركي ( فارسي + توركي ) دئييرلر .بيز بو سورونو دا يوخاريدا دئديگيميز يؤنتئمي ايجرا ائتديكدن سونرا حل ائده‌بيلديك و نهايتاً داها ساغلام كاسئتلر الد ه ائتديك .


قايناقلار :
1- زهتابي - ايران توركلري‌نين اسكي تاريخي . تبريز 1999
2- رئيس نيا - آذربايجان درسير تاريخ ايران . تبريز 1989
3- ملك زاده ديلمقاني - سلماس تاريخي - سلماس 1999
4- نيايش - آلتايلاردان سهنديميزه - تهران 2003