آذربايجانين قوجامان ائولادي محمد علي فرزانه

‏2006‏/06‏/09
آذربايجانين قوجامان ائولادي محمد علي فرزانه

دكتر توحيد ملك زاده ديلمقاني
tohidmelikzade@yahoo.com

ايللر اونجه دكتر نطقي نين وفاتي موناسبه تيله بير مقاله ده بئله يازديم:
آدام وار كي اونون اولومونه ساده جه عائله سي كدرله نير و اؤزولور/ آدام وار كي اونون اؤلومونه بير كند و يا شهر كدر له نير. آدام وار كي اونون اؤلومو بير خالقي بير ميللتي سارسيدير، غم ايله بؤرؤيور/ نئچه گون اول وفات ائده ن دكتر محمد علي فرزانه ده بو كيمي تادير و آز تايي اولان مودريك اينسان لاردان بيريسي دير. اونون انادان اولما گونلري آذربايجان تاريخينين ان حاديثه لي و چالخانتيلي گونلري ايله مصاديف ايدي: پهلوي سولاله سي اليله آذربايجان دا فارس لاشتيرما سياستي باشلانماسي. گنج ليگي ده گينه آذربايجانين چالخانتيلي ايللرينه يعني آذربايجان دموكرات فرقه سينين قورولوپ حوكومت قور ماسينا توش گلدي. فرزانه ائله بو قارانليق ايللرده پهلوي لر الي ايله يوخ اولمايا محكوم اولان آذربايجان ادبياتي ايله مشغول اولور.نه خوش كي خالقيميزين ادبيات آدرسي ني ان دوزگون وساغلام اولاراق تثبيت ائدير و ايلك دعفه اولاراق شاهنامه و گولوستان د ئييل توركلرين شاه اثري و بابالاريميزين ايتگين ميراثي ده ده قوقودو آذربايجان جوان لارينا تانيدير. فرقه داغيلاندان سونرا شاه محكمه سينده اونون سوچلاريندان بيريسي بو نهنگ كيتابين تانيتيمي اولموشدور. محمد علي فرزانه آذربايجان توركجه سينين دوشمانلارينا جواب اولارق ديليميزين گرامري ني يازيپ اونلارا ثبوت ائتدي كي بيزيم ديليميز نه اينكي ياد ديللرده ن هئچ ده اسگيك ده ييل بلكه ياپي باخيمدان دونيا ديللرينين ان گراماتيك ديللرينده ن بيريسيدير. اونون فولكلور دا ايسه الي وارايدي. خالقيميزين ميراثي ساييلان فولكلور خزينه ميزين باياتي بولومونو ان سانباللي بيچيمده آراشتيريپ وچاپ ائتدي. نه يازيق كي ياد اولكه لرده اونون خاطيري داها عزيز ايدي. اونون علمي چابالاري نتيجه سينده اسكانديناويا اؤلكه لري فرزانه ني مملكت لرينين فخري يازارلار بيرليگي نه قبول ائتسه لر ده اوز دوغما مملكتينده اونا مكمل شكيلده فعاليت ساحه سي ياراديلمادي و نهايت مملكتي ترك ائتمه گه مجبور اولدو. بورادا اونون حيات يولداشي اولان اختر خانيم دان سوز ائتمك هئچ ده يئر سيز ده ييل. فرزانه عائيله سي ايله اوتوروپ دورانلار محمد علي فرزانه نين يانيندا هميشه اونون حيات يولداشي اختر خانيمي گوروردولر. دوكتور فرزانه نين قايغي لارينين بويوك قيسميني اوستونه الان بو زحمتكش آناميز دوكتورون ال يازمالاريني سهمانلايان و اونلاري دوزگون رئداكته ائده ن اولموشدور .بو خانيمدان تشكور ائتمك هر بير آذرباجانلي نين وظيفه سي دير.
من بو كدرلي حاديثه ني آذربايجان خالقي نا و فرزانه عائله سينه باش ساغليغي وئريب آذربايجانيميزده داها چوخ فرزانه لرين بويا باشا چاتمالارين ايسته ييره م. يئري بهشت اولسون.